Alman gənclərə səfərdə də məğlub olduq

Bu gün 21 yaşadək futbolçulardan ibarət Azərbaycan yığması AÇ-2017-nin seçmə mərhələsi çərçivəsində növbəti matçına çıxıb. Allsport.az xəbər verir ki, Yaşar Vahabzadənin çalışdırdığı komandamız bu tsikldəki altıncı oyununda səfərdə qrup lideri Almaniya ilə üz-üzə gəlib.

Xatırladaq ki, millimiz sentyabrın 8-də Bakıda bu komanda ilə qarşılaşmadan böyük hesablı məğlubiyyətlə ayrılmışdı – 0:3. Onsuz da bərbad çıxışı ilə seçilən gənclər yığmamızın səfərdə almanlara daha biabırçı hesabla uduzması istisna edilmirdi. Çünki qrup lideri keçirdiyi əvvəlki üç oyunda qol buraxmadan 13 top vurmuşdu və maksimum göstəriciyə malik idi. Amma maraqlıdır ki, U-21 yığmamız səfər oyununda daha layiqli çıxış edib. Görüşdə hesabı da məhz millimiz açıb. Almanları bu seçmə mərhələdə ilk dəfə məyus edən isə Məqsəd İsayev olub. Amma futbolçularımız bu üstünlüyü sonadək qoruya bilməyiblər. Almanlar elə fasiləyə qədər hesabda önə keçməyə nail olublar. İkinci hissədə isə komandamız qapısında bir qol görüb. Nəticədə, görüş yığmamızın 1:3 hesablı məğlubiyyəti ilə bitib.

Millimizə gəlincə, yalnız ilk turda səfərdə Farer adalarına 1:0 hesabıyla qalib gəldikdən sonra futbolçularımız Avstriyaya (evdə 0:2, səfərdə 0:7), Almaniyaya (evdə 0:3) və Finlandiyaya (evdə 0:1) uduzmuşdu.

Bu gün millimizin qrupunda daha bir görüş keçirilib. Avstriya doğma meydanda Finlandiya ilə üz-üzə gəlib. Qarşılaşma avstriyalıların 2:0 hesablı qələbəsi ilə başa çatıb.

AÇ-2017-nin seçmə mərhələsi
7-ci qrup
13 noyabr

Almaniya – Azərbaycan – 3:1 (2:1)
Qollar: M.İsayev, 30 (0:1). T.Verner, 37 (1:1). M.Arnold, 43 (2:1). T.Verner, 63 (3:1).
Sarı vərəqə: V.Mustafayev, 5. A.Nağıyev, 33.
Baş hakim: Tsvetan Krastev (Bolqarıstan).
Regensburq. “Kontinental Arena”.

Almaniya: 12. Timon Vellenroyter, 2. Jeremi Toljan, 5. Niklas Süle, 16. Kevin Akpoquma, 3. Mitxell Veyser, 7. Maks Meyer, 8. Leon Qoretska (k), 17. Coşua Kimmix (18. Yanik Haberer, 82), 21. Maksimilian Arnold (10. Mark Stendera, 70), 15. Timo Verner, 22. Serce Qnabri (11. Yulian Brandt, 46).
Ehtiyat oyunçular: Yannik Hut, 4. Conatan Ta, 6. Yulian Vayql, 9. Devi Zelke.
Baş məşqçi: Horst Hrubeş.
Azərbaycan: 1. Şahruddin Məhəmmədəliyev, 2. Rahil Məmmədov, 4. Adil Nağıyev, 5. Sadiq Quliyev, 19. Məqsəd İsayev (23. Budaq Nəsirov, 81), 20. Azər Salahlı (k), 6. Vüqar Mustafayev, 7. İltər Taşkın, 8. Elşən Abdullayev (17. Abbas Hüseynov, 76), 16. Elvin Camalov, 11. Kərəm Benke (9. Fəhmin Muradbəyli, 67).
Ehtiyat oyunçular: 22. Tərlan Əhmədli, 15. Cəmil Hacıyev, 18. Fuad Bayramov, 21. Tellur Mütəllimov.
Baş məşqçi: Yaşar Vahabzadə.