Azərbaycan hakimləri EHF kubokunda

Beynəlxalq dərəcəli hakimlərimiz Ernest və Emil Ağakişi qardaşları avrokuboklara növbəti təyinat alıblar. Allsport.az saytı xəbər verir ki, referilərimiz EHF kubokunun 3-cü təsnifat mərhələsində Lüksemburqda yerli “Düdelanj”la Danimarkanın “Holstebro” komandaları arasında matçda ədaləti qoruyacaqlar.

Razılaşmaya görə, hər 2 oyun “cırdan ölkə”də keçiriləcək. Görüşlər noyabrın 15 və 16-da baş tutacaq. Bu qarşılaşmalarda Avropa Həndbol Federasiyasının nümayəndəsi çex Petr Novak olacaq. Nəzərinizə çatdıraq ki, bizdən EHF təmsilçisi olan İsgəndər Əsgərov da tez-tez qitə təşkilatının etimadını qazanır.