“Bizim işimiz futbolçuların sağlamlığını təmin etməkdir”

“Qəbələ”nin həkim-fizioterapevti Rahim Məhərrəmov klub saytına açıqlamasında zədəli futbolçuların son durumu barədə danışıb. Allsport.az xəbər verir ki, hər şeyin plana uyğun inkişaf etdiyini deyən mütəxəssis, hazırda əsas diqqətin futbolçuların vitaminlərlə təmininə və əzələlərin düzgün inkişafına ayrıldığını vurğulayıb:

“Futbolçular istirahətə buraxılarkən başlıca məqsəd onların futboldan müəyyən qədər uzaq durmalarını, psixoloji və fiziki cəhətdən istirahətini təmin etməkdir. Təbii ki, istirahət zamanı fiziki formanı qorumaq, artıq çəkinin yaranmasına imkan verməmək vacib faktordur. Bu baxımdan bütün futbolçulara fərdi olaraq tapşırıqlar vermişdik. Bəzi futbolçular istirahətə zədəli yollanmışdılar. Hansısa problemi olanların düşərgəyə daha yaxşı formada dönmələrini təmin etmək məqsədilə onları fasilə müddətində nəzarətdə saxladıq. Sevindirici haldır ki, belə futbolçularımızdan bəziləri artıq sağlam şəkildə, tam bərpa olaraq komandanın sıralarına dönüb. Uzun müddət zədədən əziyyət çəkən Ruslan Əmircanov və Viktor Mendi kollektivlə birlikdə məşq edir. Ekiqo Ehiosun və Pavol Farkaş komandadan ayrı fərdi hazırlıq keçir. Onların da yaxın günlərdə komandaya qoşulacağını demək olar”.

Məhərrəmov fasilə dönəmində qidalanmaya xüsusi diqqət yetirdiklərini bildirib: “İstər istəməz futbolçuların bir çoxunda fasilədən dönərkən az da olsa artıq çəki olur. Amma bu o qədər də önəmli məsələ deyil. Çünki futbolçular məşq posesində qısa zaman kəsiyində artıq çəkidən xilas ola və öz ideal formalarına qayıda bilirlər. Hazırda əsas diqqəti futbolçuların vitaminlərlə təmin olunmasına və müəyyən müddət fiziki yükləmələrdən kənar qalmış əzələlərinin düzgün inkişafına yönəltmişik. Bu mənada qidalanmaya və masaja xüsusi önəm veririk. Hər şey plana uyğun davam edir. Təbii ki, müəyyən əzələ yorğunluqları olur. Bizim də işimiz belə problemləri aradan qaldırmaq, futbolçuların sağlamlığını təmin etməkdir”.

Həmin kateqoriyadan