Boks millimiz mundial öncəsi Meksikada hazırlıq keçir

Boks üzrə milli komandamız təlim-məşq toplanışı üçün Meksikaya yollanıb. Allsport.az xəbər verir ki, boksçularımız oktyabrda Qətərdə keçiriləcək dünya çempionatına Şimali Amerikada hazırlıq keçirlər.

Rio de Janeyro Olimpiadasına lisenziya xarakterli yarışda komandamız tam heyətlə çıxış edəcək. Meksikadakı təlim-məşq toplanışında baş məşqçi Pedro Roke, məşqçilər Lazaro Ximenes və Nəriman Abdullayevin rəhbərliyi altında 9 bokçumuz hazırlıq keçir. Seçmə komandamızın liderlərindən yalnız Məhəmmədrəsul Məcidov (+91 kq) zədə səbəbindən toplanışa yollanmayıb. Avropa Oyunlarında iştirak etməyən Cavid Çələbiyev (56 kq) bu dəfə heyətə daxil edilib. Bu yaxınlarda Bolqarıstanda keçirilən Avropa çempionatında bürünc medal qazanan Rüfət Hüseynov da Meksikaya yollanıb.

Komandamızın sentyabrın 5-nə kimi Meksikada qalması gözlənilir. Xatırladaq ki, boksçularımız Avropa Oyunlarından öncə də bu ölkədə toplanış keçiblər.

49 kq. Rüfət Hüseynov
52 kq. Elvin Məmişzadə
56 kq. Cavid Çələbiyev
60 kq. Albert Səlimov
64 kq. Lorenzo Sotomayor
69 kq. Pərviz Bağırov
75 kq. Xaybulla Musalov
81 kq. Teymur Məmmədov
91 kq. Abdulqadir Abdullayev