EYOF-a hazırlaşan qoşaçarxçımız Belçikada çempion olub

Gələn ay paytaxtda yeniyetmələrin Avropa yay olimpiya festivalında iştirak edəcək oğlan və qızlardan ibarət U17 yığma komandalarımızın üzvləri Belçikada hazırlığı davam etdirirlər. Allsport.az saytı xəbər verir ki, təlim-məşq çərçivəsində idmançılarımız bu ölkədə təşkil edilən beynəlxalq turnirlərdə də mübarizə aparırlar. 

Baş məşqçi Əbülfəz Məmmədovun rəhbərliyi ilə heyəti Kamran Mirzəxanov, Nofəl Nuriyev, Nikita Sıtov və Mustafa Muxtarlıdan ibarət komandamız Bertem şəhərində keçirilən beynəlxalq yarışda uğurla çıxış edib.

Belçikanın “Cannibal” komandasının heyətində yarışan velosipedçilərimiz 40 km məsafəyə qrup ötüşməsi zamanı əla komanda işi sərgiləyərək Nikita Sıtovun finiş xəttini 1-ci keçməsinə şərait yaradıblar və təmsilçimiz fəxri kürsün ən yüksək pilləsinə qalxıb. 

Qeyd edək ki, EYOF-da iyulun 23-də fərdi, 25-də isə qrup ötüşməsi üzrə qaliblər müəyyənləşəcək.