QƏRAR

İlk dəfə U-23 Avropa çempionatı keçiriləcək

Ötən həftə Moskvada keçirilmiş Avropa Millətlər Kuboku yarışı zamanı Dünya Güləş Birliyi İcraiyyə Komitəsinin növbəti iclası keçirilib. Allsport.az saytı xəbər verir ki, toplantıda müzakirə edilən cari məsələlərlə yanaşı, bir sıra yeni qərarlar da qəbul edilib. UWW gələn ildən etibarən Avropa Güləş Assosiasiyası – CELA-nın U-23 qitə çempionatını keçirməsinə razılıq verib və 2015-ci ilin təqvim planına daxil edib. Beləliklə, 2015-ci ilin 24-29 mart tarixlərində Polşanın paytaxtı Varşavada ilk dəfə olaraq güləş üzrə U-23 Avropa çempionatı keçiriləcək.

Dünya Güləş Birliyinin prezidenti Nenad Laloviç bildirib ki, Avropa qitəsində mövcud olan rəqabət imkanı gənclər yaş kateqoriyasına aid olmayan güləşçilərə kömək etməyimizi tələb edir. Bu çempionat gənc güləşçilərə böyüklər yaş kateqoriyasında iştiraka daha yaxşı hazırlaşmalarına imkan verəcək.

DGB İcraiyyə Komitəsinin iclasında qəbul edilmiş digər qərara əsasən, gələcək Dünya Kuboku yarışlarında əvvəlki kimi 10 deyil, 8 komandanın iştirakı razılaşdırılıb. Bu, 2013-cü ildə çəki dərəcələrində edilmiş dəyişikliklərin nəticəsində dən irəli gəlib və yarışın əhəmiyyətini qoruyub saxlamağa xidmət edəcək.

Gələn il keçiriləcək Dünya Kubokunun püşkatması 14 yanvar 2015-ci ildə İsveçrənin Lozanna şəhərində Beynəlxalq Olimpiya Komitəsinin muzeyində baş tutacaq. Özbəkistanın paytaxtı Daşkənd şəhərində keçirilmiş dünya çempionatında hər bir güləş növü üzrə ilk 8 yeri tutmuş komandalar Dünya Kuboku uğrunda mübarizə aparacaq.