Karateçilərimizin Xorvatiya sınağı

Yeniyetmə və gənclərdən ibarət seçmə komandalarımız Xorvatiyada beynəlxalq turnirə yollanıblar. AMKF-in media və ictimaiyyətlə işlər katibi Sənan Məhərrəmovun allsport.az saytına verdiyi məlumata görə, Samobor şəhərində 26-cı Xorvatiya qran-prisində 27 idmançımız iştirak edəcək. 14-15 yanvarda nüfuzlu yarış, fevralın ortaları yeniyetmə və gənclərin növbəti Avropa çempionatına hazırlıq xüsusiyyəti daşıyır.

13-15 yaşlı yeniyetmələr və 16-17 yaşlı gənclərdən ibarət komandanın böyük məqçisi Anar Allahverdiyev və onun köməkçisi Qurban Tağıyev 16 idmançını sınaqdan keçirməyi qərara alıb. Yeniyetmələrdə Tale Yaqubov (52 kq), Rəşid Həqiqətli (57 kq), Tural Yaqubov (63 kq), Fərid Şahbazlı (70 kq), Mədinə Sadıqova (47 kq) və Ayla Rzazadə (54 kq), 16-17 yaşlı gənclərdə Həsən Əliyev (55 kq), Hümmət Baxşəliyev (61 kq), Ruslan Əhmədov (68 kq), Murad Balakişiyev (76 kq), Murad Hacızadə (+76 kq), Fidan Teymurova (48 kq), İnci Əzizova (53 kq) və Bəsti İsmayılova (+58 kq) tatamiyə çıxacaqlar.

18-20 yaşlı gənclərin böyük məşqçisi, əməkdar məşqçi Şahin Xudaverdiyev isə Ülvi Qurbanov (60 kq), Elcan Məmmədrzayev (60 kq), Mirtaleh Əliyev (67 kq), Vüsal Kamallı (75 kq), Elman Babayev (84 kq), Asiya Məlikova (50 kq), Aytac Əliyeva (55 kq) və Fəridə Əliyevaya (+68 kq) etimad göstəriblər.

Milli komandanın böyük məşqçisi Vahid Ayvazov və onun köməkçisi Vüqar Kərimov katada Ceyhun İsmayılovla Emiliya Mitilimovanı 14-15 yaşlılar arasında, İbrahim Ağəlini 16-17 yaşlılarda, Həsən Rüstəmovu 18-20 yaşlılarda, Sahib Əhədovu yuxarı yaşlı fiziki qüsurlu idmançıların mübariəsində yoxlayacaq.

Beynəlxalq hakim Vüqar Kərimovdan başqa, milli dərəcəli hakim Cavid Rəfiyev də təcrübəsini artırmaq üçün yarışı idarə edənlər arasında olacaq. İdmançılarımız ənənəvi Xorvatiya Qran Prisindən Bakıya ayın 16-da dönəcəklər.

Həmin kateqoriyadan