Nigar Arpadarai: Yerli tamaşaçılara müxtəlif endirimlər təklif edəcəyik

Gələn ilin aprelində formula1 Azərbaycan mükafat yarışı üçün bilet satışı başlayacaq. Allsport.az saytı xəbər verir ki, Bakı Şəhər Halqası əməliyyat şirkətinin marketinq və kommunikasiya şöbəsinin rəhbəri Nigar Arpadarai yeni mövsümdə yerli tamaşaçılar üçün xüsusi endirimlərin olacağını deyib:

“Hər ötən il bir əvvəlki ilə müqayisədə daha çox yerli azarkeşin bilet alaraq yarışın bütün sessiyalarında və həmçinin yarışdan kənarda onlar üçün hazırladığımız əyləncə proqramlarında, xüsusən də dünya ulduzlarının iştirakı ilə baş tutan möhtəşəm konsertlərdə böyük coşğu ilə iştirak etməsi bizi çox sevindirir.

Biz bu il yarışa daha çox yerli tamaşaçı cəlb etmək üçün müxtəlif endirimlər təklif edəcəyik. Bununla bağlı ilk satış kampaniyamız noyabrın 6-da başlayacaq və həmin gün biz ölkə ictimaiyyətinə yarış həvəskarları üçün təklif olunan xüsusi endirimlərin detallarını açıqlayacağıq. İnanırıq ki, builki yarışda rekord göstəricidə tamaşaçı iştirakına nail olacağıq”.

Qeyd edək ki, 2018 formula1 Azərbaycan mükafat yarışını izləmək istəyən tamaşaçılara trekin müxtəlif yerlərindən imkan verən və ümumi tutumu 30 min yerlik olan tribuna və ayaqüstü zonalar təklif olunur.