“Odlar yurdu” ABŞ-ın Florida ştatında kubok uğrunda mübarizə aparacaq

Poloçularımız ABŞ-ın Florida ştatında beynəlxalq kubok mübarizəsində iştirak edəcək. Allsport.az saytı xəbər verir ki, “Grand Champions Polo Club”un təşkilatçılığı ilə baş tutacaq turnir payız mövsümünün son həftəsində keçirilən ən böyük yarışdır. 2012-ci ildən etibarən 6 dəfə çempion olan yerli komanda bu dəfə dünyanın ən məşhur güclü polo yığmasını – “Odlar yurdu” ilə qarşılayacaq.

Yüksək səviyyədə təşkil olunan turnirdə bir çox ölkələr, o cümlədən Argentina, Braziliya, Kanada, Çili, Ekvador, İngiltərə, Fransa, Hindistan, Meksika, Yeni Zelandiya, Nigeriya və Cənubi Afrika Respublikası iştirak edəcəklər.

Start heyətində Elçin Camallı, Amil Namazov, Andres Laplasette, Adrian Laplasette və Rəşad Həsənov yer alacaqlar. Komandanın baş məşqçisi Namiq Orucovdur.

Xatırladaq ki, yığmamız İtaliyanın Siena şəhərində ilk dəfə iştirakçısı olduğu Avropa çempionatında 2-ci yeri tutub.