Qara Qarayev: “Hava şəraitini qabartmazdım”

Azərbaycan millisinin yarımmüdafiəçisi Qara Qarayev DÇ-2018-in seçmə mərhələsində Şimali İrlandiyaya qarşı səfər oyunundan sonra fikirini bölüşüb. Allsport.az saytı xəbər verir ki, o, 0:4 hesablı məğlubiyyət haqda bunu deyib: “Şimali İrlandiya bu gün ən güclü cəhətlərindən yararlandı. Standart vəziyyətlərdən üç qol vurdular. Bu da gözlənilən idi. Çünki rəqib bütün oyun taktikasını bunun üzərində qurmuşdu. Çoxlarının bizdən yaxşı nəticə gözlədiyini bilirdik. Amma məğlub olduq. Artıq danışılası bir şey yoxdur. Növbəti oyunlara hazırlaşmalıyıq.

Hava şəraitini qabartmazdım. Sadəcə, Şimali İrlandiya Çex Respublikası ilə müqayisədə standart vəziyyətlərdən daha yaxşı yararlandı. Gördüyünüz kimi, autdan bütün topları cərimə meydançasına atırdılar. İnşallah, məğlubiyyət komandada ruh düşkünlüyü yaratmaz. Bu gün komandanı dəstəkləyənlər, bizə inananlar daha çoxdur. Nə qədər istəməsək də, bəzən belə məğlubiyyətlər olur.

Şimali İrlandiya yığması heç də zəif komanda deyil. Avropa çempionatının final mərhələsində çıxış ediblər. Şimali İrlandiya ilə oyuna qədər olan həvəs və istək ilə davam etməliyik. Çünki bizi qarşıda iki çətin oyun gözləyir. Almaniya və Şimali İrlandiya ilə oyunları nəzərdə tuturam. Həmin oyunlarda daha yaxşı nəticə göstərib, qrupda layiqli yer tutmalıyıq”.

Həmin kateqoriyadan