“Qarabağ” daha bir rekordu təkrarladı

Premyer Liqada ardıcıl 9 qələbə ilə tarixinin rekordunu təkrarlayan Ağdamın “Qarabağ” klubu ölkə kubokunda da eyni nailiyyəti göstərib. Allsport.az saytı xəbər verir ki, Qurban Qurbanovun komandası özünün Azərbaycan kuboku tarixindəki ən uzun qələbə seriyasını təkrarlamağa nail olub.

İlk kubok yarışını buraxıb, 1993-cü ildə turnirdə debüt edən “ağ-göylər” 23 illik tarixdə ən yaxşı halda 6 qələbəlik seriyaya imza atmışdı. Bu seriya 1995-ci ilə təsadüf etmişdi. 1994/95 mövsümünü qələbə ilə başa vuran ağdamlılar 1995/96 mövsümünə 5 qələbə ilə başlamışdı. 21 ildən sonra həmin rekordu təkrarlayan “Qarabağ” cari mövsüm kubokda keçirdiyi 5 oyunun hamısında qələbə qazanıb.

Əyalət klubu seriyasına 2014/15 mövsümünün final matçından start verib. Həmin qarşılaşmada “Neftçi”ni 3:1 hesabı ilə məğlub edən “Qarabağ” cari kubok turnirinə “Şəmkir”lə 1/8 final oyunu ilə başlayıb – 2:0. 1/4 finalda “Sumqayıt”ı əvvəl 2:0, ardınca 4:1 yenən ağdamlılar  yarımfinalda “İnter”i 2 dəfə məğlub edib – 4:0, 1:0. “Ağ-göylər”in qalib gəlmədiyi son kubok oyunu ötən mövsümün yarımfinal mərhələsinə təsadüf edib. “Simurq”la cavab oyununda qapılara qol vurulmayıb.

Qeyd edək ki, ölkə kubokunda ən uzun qələbə seriyası “Kəpəz”ə məxsusdur. Gəncəlilər 1993-95-ci illərdə ardıcıl 13 kubok qarşılaşmasında qalib gəlib.

Həmin kateqoriyadan