“Qızıl qran-pri”də ən yaxşı nəticə yunan-Roma güləşçilərimizdə oldu: 4 qızıl, 1 gümüş və 2 bürünc

Bakı İdman Sarayında ümummilli lider Heydər Əliyevin xatirəsinə FİLA “Qızıl qran-pri”nin final mərhələsi başa çatıb. Allsport.az saytı xəbər verir ki, yarışda 49 ölkədən 500-ə yaxın ən güclü pəhləvanlar mübarizə aparıb. Son mübarizə günündə “klassiklər” rəqabətə qoşulublar.

Millimiz bu sınaqda 4 qızıl, 1 gümüş və 2 bürünc medal qazanıb. Həsən Əliyev (71 kq), Rafiq Hüseynov (80 kq), İslam Abbasov (85 kq) və Oyan Nəzəriani (130 kq) 1-ci, Elvin Mürsəliyev (75 kq) 2-ci, Rövşən Tağıyev (66 kq) və Soltan İsmayılovun (85 kq) 3-cü yerləri tutublar.

Xatırladaq ki, sərbəst güləşçilərimiz 3 qızıl, 1 gümüş və 3 bürünc, qadınlarımız 1 gümüş və 2 bürünc medala yiyələniblər.