Qoşaçarxçımız Portuqaliya trekində 3-cü olub

Portuqaliyada trek velosipedi üzrə ənənəvi “Prova Internacional Municipo de Anadia” turnirinə yekun vurulub. Allsport.az saytı xəbər verir ki, 1-ci kateqoriyalı yarışı elit yığmamızın üzvü Sergey Omelçenko üçün uğurlu olub. Keyrin növündə mübarizə aparan təmsilçimiz təsnifat yürüşünü inamla keçərək final mərhələsinə vəsiqə qazanıb.

Həlledici yürüşdə İspaniya və Kanadanın 2, İtaliyanın isə 1 idmançısı ilə mübarizə aparan velosipedçimiz finiş xəttini 3-cü keçib və Anadia turnirinin bürünc medalına layiq görülüb. İtaliyalı Francesko Sesi 1-ci, ispan Xose Moreno Sançes isə 2-ci olub. Nüfuzlu yarışda əldə etdiyi bürünc medal Sergey Omelçenkoya həm də 160 reytinq xalı qazandırıb.

Qeyd edək ki, Beynəlxalq Velosipedçilər İttifaqının reqlamentinə əsasən, trek növündə çıxış edənlər olimpiya oyunlarına 2 il qalmış reytinq xalları toplamaqla “dördilliy”ə lisenziya qazanırlar.