Raquf Orucov kubokunun açılışı olub

Bakı İdman Sarayında aprel döyüşlərində qəhrəmancasına həlak olmuş polkovnik-leytenant Raquf Orucovun xatirəsinə cüdoçuların 2-ci Raquf Orucov kubokunun açılışı olub. Allsport.az saytı xəbər verir ki, tədbirdə dövlət və hökumət qurumlarının nümayəndələri, Milli Məclisin deputatları, veteran hərbçilər, şəhid ailələrinin üzvləri, tanınmış idmançılar, ictimai təşkilatların təmsilçiləri iştirak ediblər. Öncə dövlət himni səsləndirilib, şəhidlərin xatirəsi bir dəqiqəlik sükutla yad edilib. Sonra ordumuzun zəfər salnaməsinə qəhrəmanlıq səhifəsi kimi yazılmış 2016-cı ilin aprel döyüşləri haqqında qısa videoçarx nümayiş olunub.

Milli Məclisin deputatı Qənirə Paşayeva, ACF-nin nümayəndəsi Sahib İsmayılov aprel döyüşlərinin əhəmiyyətindən, hərbçilərimizin şücaətindən danışıb, Raquf Orucovun və digər şəhidlərin qəhrəmanlığının gənc nəsil üçün örnək olduğunu bildiriblər. Şəhid polkovnik-leytenantın qardaşı Zabil Orucov turnirin təşkilatçısı “Azman” holdinqə və “Judo Club 2012” idman klubuna ailə üzvləri adından təşəkkür edib.

Azərtac-ın məlumatına görə, turnirin açılış mərasimində yeniyetmə cüdoçular nümunəvi çıxışlar ediblər. İncəsənət ustaları vətənpərvər ruhda musiqi parçaları səsləndiriblər. Aprel döyüşlərində həlak olmuş hərbçilərin portretləri həkk edilən köynəklər geymiş ASAN könülləri tamaşaçıların alqışları altında meydançaya çıxıblar. Sonda turnirdə iştirak edən idmançılar tatami üzərinə dəvət olunublar.

Həmin kateqoriyadan