Tural Axundov: “Turnir cədvəlinin ilk üçlüyündə biz də olmalıydıq”

“Simurq” mövsümün sonunda müqaviləsi başa çatacaq olan Tural Axundovla yeni iki illik müqavilə imzalayıb. Allsport.az xəbər verir ki, 26 yaşlı futbolçu bununla bağı fikirlərini klub saytı ilə bölüşüb, komanda və özü haqqında bir neçə sualı cavablandırıb.

– Öncə təbrik edirik. Artıq bir ildən artıqdır komandadasan. Bununla bağlı fikirlərini bilmək istərdik…
– Məşqçilər və klub rəhbərliyi sağ olsun ki, məni bu komandaya dəvət etmişdi. Qeyd etdiyiniz kimi, artıq bir ildən çoxdur “Simurq”dayam. Bu qərarıma görə də heç bir vaxt peşman olmamışam. Öz növbəmdə oyunumla bu qərarlarının düzgün olduğunu göstərmək üçün hər oyunda özümü doğrultduğumu hesab edirəm. Bundan sonra da daha yaxşı olmaq üçün çalışacağam.

– Bu müddəti özün üçün necə dəyərləndirərdin?
– Düzünü deyim, ötən mövsüm elə də davamlı olaraq yaxşı oyun nümayiş etdirə bilmədim. İlk vaxtlarda komandaya və Zaqatalaya uyğunlaşmağa çalışdım. Daha sonra arada zədələrim oldu. Ancaq sonradan məşqçinin və komandanın taktikasına uyğunlaşdım. Bu mövsüm şükürlər olsun ki, oyunumdan razıyam. İnşallah, zədəsiz bir mövsüm olar mənim üçün. Komandamızın uğur qazanması üçün də üzərimə düşən işin öhdəsindən layiqincə gələrəm.

– “Simurq”un hazırda çempionatdakı vəziyyəti haqqında nə deyərdin?
– Geridə qalan 12 turda çox lazımsız xallar itirdik. “Bakı”, “Qəbələ” oyunlarında məğlub olmamalıydıq. “Xəzər Lənkəran”la səfərdə keçirdiyimiz qarşılaşmada rəqibdən yaxşı oynasaq da, bəxtimiz gətirmədi ki, oradan xalla qayıdaq. Bu görüşlərdəki nəticələrimiz mövsümün sonuna qədər bizə mane olacaq. Əgər hər şey istədiyimiz kimi olsa idi, indi turnir cədvəlinin ilk üçlüyündə biz də var idik. Ancaq hələ şanslarımız var. Hazırda dördüncü pillədəyik. İnşallah, qarşıdakı oyunlarda maksimum nəticə göstərib, sonda istəyimizə nail olacağıq. Heç bir çəkilən əziyyət qarşılıqsız qalmır. Hər şey öz əlimizdədir. Allahın köməyi ilə sonda sevinən tərəflərdən biri də biz olacağıq.

– Növbəti rəqib “Qəbələdir”. Bu oyunla bağlı düşüncələrin nədir?
– Hər bir komanda öz meydanında daha güclü oyun nümayiş etdirir. Biz mövsümün əvvəlindən hər qarşılaşmaya yalnız üç xal qazanmaq üçün çıxırıq. “Neftçi” qalibiyyətindən sonra komandada əhval-ruhiyyə yüksək səviyyədədir. Bunun davamını gətirmək istəyirik. Bilirik ki, bizi çətin oyun gözləyir. Ancaq bir heç bir rəqibdən çəkinmirik. İnanıram ki, Qəbələdən üç xalla qayıdıb, turnir cədvəlindəki iddiamızı bir daha nümayiş etdirəcəyik.

– “Simurq”un heyətində azarkeşlərin ən çox sevdiyi futbolçulardan biri də sənsən. Bu barədə nə deyərdin?
– Azarkeşsiz futbolun marağı yoxdur. Onlar hazırda ölkədə bir nömrədir. Hər bir qələbəmizdə böyük pay sahibləridir. Yalnız oyunlarda deyil, məşqlərdə belə gəlib bizi dəstəkləyirlər. Buna görə onlara təşəkkür edirəm. Mən də onları çox sevirəm. Hər birinə hörmətlə yanaşıram. Çalışırıq “Simurq” gözəl nəticələr qazansın və meydanda sevinən tərəf bizim azarkeşlərmiz olsunlar.