AFFA liqaları ləğv etdi

Uşaq futbolu

22 may 2020 / 15:45 Baxış sayı: 826

Koronavirus pandemiyası ilə əlaqədar yaranmış mövcud vəziyyət nəzərə alınaraq, AFFA-nın bayrağı altında keçirilən liqalarla bağlı təqdimat hazırlanaraq icraiyyə komitəsinin üzvlərinə göndərilib. Allsport.az xəbər verir ki, təqdimatda liqalar barədə ətraflı məlumat, hazırkı vəziyyət və UEFA-nın üzvü olan digər milli assosiasiyalarda pandemiya amili nəzərə alınaraq qəbul olunmuş qərarların qısa xülasəsi öz əksini tapıb.

Xüsusi karantin rejimi ilə əlaqədar AFFA İcraiyyə Komitəsinin iclasının keçirilməsi mümkün olmadığı üçün telefon zəngi vasitəsilə liqalarla bağlı təqdimatda qeyd olunmuş məsələlər barədə hər bir üzvün münasibəti öyrənilib.

AFFA rəhbərliyi və icraiyyə komitəsinin üzvləri, ilk növbədə, ölkəmizdə koronavirus (COVID-19) infeksiyasının qarşısının alınması, pandemiya dövründə vətəndaşların sağlamlığı naminə dövlət tərəfindən həyata keçirilən məqsədyönlü tədbirlərlə əlaqədar Azərbaycan Respuklikasının prezidenti İlham Əliyevə minnətdarlığını bildirib.

Aparılan geniş müzakirələrdən sonra səs çoxluğu ilə aşağıdakı qərarlar qəbul olunub: 1. Koronavirus pandemiyası ilə əlaqədar mövcud vəziyyət, Nazirlər kabineti yanında operativ qərargahın təhsil müəssisələrində tədris prosesi ilə bağlı qəbul etdiyi müvafiq qərarlar nəzərə alınaraq, AFFA-nın təşkilatçılığı ilə keçirilən U-9, U-10, U-11, U-12, U-13, U-14, U-15, U-16, U-17 liqalarında, U-11, U-13, U-16 və yüksək qızlar liqalarında, “Coca-Cola Məktəbli Kuboku” turnirində, region liqasında mövsüm başa çatdırılsın. Final mərhələsi play-off sistemi ilə keçirilən turnirlər istisna olmaqla, digər liqalarda hazırda turnir cədvəlində birinci pillədə olan komandalar qalib elan olunsun.

Koronavirus (COVID-19) pandemiyası ilə bağlı müsbət istiqamətdə dəyişikliklər baş verərsə, Nazirlər kabineti yanında operativ qərargahın qəbul etdiyi qərarlar nəzərə alınmaqla, yekunlaşdırılmış liqaların komandaları arasında mini-turnirlərin təşkil olunması nəzərdə tutulsun.

Qalibləri elan olunan liqalarda hazırkı turnir cədvəli aşağıdakı kimidir:

BAKCELL U-17 LİQASI
Yer	Komanda	O	Q	H	M	VQ	BQ	T/F	Xal
1	Sabah	18	14	1	3	65	14	51	43
2	Zirə	18	11	3	4	57	23	34	36
3	Keşlə	18	11	1	6	40	14	26	34
4	Tufan	18	10	4	4	45	28	17	34
5	Sumqayıt	18	11	1	6	36	25	11	34
6	Qəbələ	18	10	2	6	50	23	27	32
7	Qarabağ	18	10	2	6	41	30	11	32
8	Neftçi	18	9	4	5	46	30	16	31
9	Səbail	18	8	5	5	40	24	16	29
10	Kəpəz	18	7	3	8	29	34	-5	24
11	İsgəndər Cavadov BFA	18	4	0	14	27	72	-45	12
12	Neftçi İK İB	18	2	4	12	14	40	-26	10
13	Xəzər Lənkəran	18	2	0	16	12	60	-48	6
14	İOEUGİM (Sumqayıt)	18	2	0	16	8	93	-85	6

U-16 LİQASI
Yer	Komanda	O	Q	H	M	VQ	BQ	T/F	Xal
1	Qəbələ	22	19	0	3	88	15	73	57
2	Neftçi	22	17	1	4	89	17	72	52
3	Sumqayıt	22	14	5	3	61	23	38	47
4	Keşlə	22	14	2	6	79	35	44	44
5	Səbail	22	13	3	6	60	26	34	42
6	Qarabağ	22	12	3	7	39	27	12	39
7	Sabah	22	11	2	9	57	32	25	35
8	Neftçi İK İB	22	6	7	9	47	37	10	25
9	Zirə	22	5	3	14	37	43	-6	18
10	Xilə	22	2	4	16	14	97	-83	10
11	Mil-Muğan	22	2	0	20	15	122	-107	6
12	İsgəndər Cavadov BFA	22	1	2	19	14	126	-112	5

BOULEVARD HOTEL U-15 LİQASI
Yer	Komanda	O	Q	H	M	VQ	BQ	T/F	Xal
1	Qəbələ	16	15	1	0	61	3	58	46
2	Neftçi	17	13	1	3	51	13	38	40
3	Qarabağ	17	10	1	6	46	22	24	31
4	Səbail	17	10	0	7	41	25	16	30
5	Keşlə	17	9	3	5	30	22	8	30
6	Sabah	16	9	2	5	56	13	43	29
7	Sumqayıt	16	8	3	5	29	17	12	27
8	Zirə	17	8	1	8	29	28	1	25
9	Binə	16	7	1	8	29	32	-3	22
10	Kəpəz	15	4	2	9	15	56	-41	14
11	Neftçi İK İB	16	2	2	12	11	38	-27	8
12	Turan Tovuz	17	2	0	15	4	71	-67	6
13	İsgəndər Cavadov BFA	17	0	1	16	7	75	-68	1

2. Azərbaycan premyer liqası və birinci divizionla bağlı məsələyə koronavirus pandemiyası ilə əlaqədar vəziyyət və Nazirlər kabineti yanında operativ qərargahın qəbul etdiyi qərarlar nəzərə alınmaqla növbəti həftələrdə baxılsın.

3. AFFA-nın gənclər liqası ilə bağlı məsələyə UEFA ilə məsləhətləşmələrin nəticəsi, koronavirus pandemiyası ilə əlaqədar vəziyyət və Nazirlər kabineti yanında operativ qərargahın qəbul etdiyi qərarlar nəzərə alınmaqla növbəti həftələrdə baxılsın.

4. Futzal üzrə yüksək liqa, birinci liqa, ikinci liqa və Azərbaycan kuboku ilə bağlı futzal federasiyası tərəfindən müvafiq təkliflər hazırlanaraq AFFA-ya təqdim olunsun. AFFA-nın rəyindən sonra müvafiq liqalarla bağlı futzal federasiyası tərəfindən qərarlar qəbul edilsin.