Albert Səlimov: Rio-2016-da hədəfim yalnız qızıl medaldır

««Bakı Fires»in baş meneceri Rizvan Gənciyev klubda döyüşməyimi məqsədəuyğun hesab etmədi. Bildirdi ki, qoy milli komanda ilə Rio olimpiadasına hazırlaşım». Bunu allsport.az saytına açıqlamasında boksçu Albert Səlimov dedi. Bakı-2015-in qalibinin sözünə görə, Braziliyada təşkil olunacaq «dördillik» onun üçün son olimpiya mərhələsidir:

«Artıq 30 yaşın içindəyəm. Karyeramda çox titul qazanmışam – Avropa və dünya çempionu olmuşam. Amma medal boxçamda olimpiya oyunlarıın qızıl medalı yoxdur. Rio-2016-da hədəfim yalnız budur. Çünki bu, son imkanımdır.

Aşağı yerləri tutanda, o qədər də yadda qalmırsan. Ancaq baş mükafata yiyələnəndə, uzun müddət səndən danışırlar, çempion kimi əbədi xatirələrdə qalırsan. Ona görə də, Azərbaycana Riodan qalib kimi dönmək istəyirəm».