AMADA və BM idmançı hüququnun müdafiəsini gücləndirməyə başladılar

Milli antidopinq agentliyi və “Morrison Partners” şirkəti idmançıların hüquqlarının müdafiəsini gücləndirmək məqsədi ilə əməkdaşlığa başlayıblar. Allsport.az saytı xəbər verir ki, anlaşma çərçivəsində AMADA-nın fəaliyyəti ilə bağlı xüsusi yaradılmış intizam və apellyasiya komitələrində agentliyin yurisdiksiyasına daxil olan idmançılar barədə başlanılan və ya icraatda olan işlərdə, BM hüquq şirkəti tərəfindən bu idmançılara hüquqi yardım göstəriləcək. Şirkət idmançılara hüquqi xidmətləri pro bono (ödəniş almadan) əsasında göstərəcək. Bütün işlərin təcrübəli vəkillər və hüquqşünaslar tərəfindən aparılması nəzərdə tutulur.

“Bu memorandum, idmanda dopinqə qarşı mübarizə və antidopinq qaydalarının tətbiqi zamanı insan hüquqlarının qorunmasını gücləndirmək, idmançıların ədalət mühakiməsinə çıxışını asanlaşdırmaq məqsədlərini daşıyır. Bu fundamental hüquqlar Avropa insan hüquqları konvensiyası, Avropa şurasının antidopinq konvensiyası və idman sahəsini əhatə edən digər beynəlxalq sənədlərdə əks etdirilir”, – AMADA-nın direktoru və Avropa Şurasının “İnsan hüquqları və idmançılar” üzrə xüsusi işçi qrupunun sədr müavini Şəfəq Hüseynli imzalanmadan sonra deyib. Onun sözünə görə, antidopinq təşkilatları və hüquq şirkətlərinin bu formada əməkdaşlığı idman dünyası üçün bir yenilikdir.

“Belə şəffaf və qanunçuluq proseslərinin bir hissəsi olmaq bizim kimi bir müstəqil hüquq şirkəti üçün kifayət qədər vacib hadisədir. Ölkənin aparıcı şirkəti olaraq bu sahəyə töhfə verməyimizdən qürur duyuruq. Bütövlüklə Birləşmiş Krallıq kapitalı ilə fəaliyyət göstərən bir yerli hüquq şirkəti kimi, biz ən yaxşı Britaniya təcrübəsini Azərbaycana gətirməyə şad olarıq”, – BM Morrison Partners hüquq şirkətinin baş tərəfdaşı Fərhad Mirzəyev bildirib.

Avropa şurasının antidopinq konvensiyası 1989-cu ildə qəbul edilib. Azərbaycan bu sənədi 2002-ci ildə imzalayıb. Ölkəmizin ilk özəl hüquq şirkəti olan “Morrison Partners” 1992-ci ildə təsis edilib. BM xarici dövlətlərdə (Böyük Britaniya, BƏƏ və Rusiya) nümayəndəlikləri olan ilk və yeganə Azərbaycan hüquq şirkətidir. Geniş profilli hüquq şirkəti olan BM hüququn bütün sahələri üzrə böyük təcrübəyə malikdir.