Azərbaycan kubokunda 4-cü mərhələyə son

Şose velosipedi üzrə ölkə kubokunda 4-cü mərhələyə yekun vurulub. Allsport.az saytı xəbər verir ki, İsmayıllı rayonunda yarışın qalibi 2 günün nəticəsinə əsasən  müəyyənləşib. Reqlamentə görə 3 kateqoriyada keçirilən yarışda 17 yaşadək oğlanlar və qızlar, həmçinin gənclər və U23/ elit yaş kateqoriyası üzrə mübarizə gedib.

4-cü mərhələnin birinci günündə yeniyetmə oğlanlar və qızlar 3 km, gənclər, elit və U-23 yaş kateqoriyası üzrə idmançılar isə 6 km məsafəyə dağa fərdi ötüşmədə mübarizə aparıblar. Növbəti gün isə qrup ötüşməsində yeniyetmə oğlanlar və qızlar 60 km, digər yaş kateqoriyası üzrə idmançılar isə 90 km məsafədə ən güclünü müəyyənləşdiriblər.

İki yarış gününün nəticəsinə əsasən qızlar arasında Radha Şabanova fəxri kürsünün ən yüksək pilləsinə qalxıb. Lalə Abdurəhmanova ikinci, İradə Abdurahmanova isə üçüncü olub. 17 yaşadək oğlanlar arasında Ravi Rzayev bütün rəqiblərini geridə qoyub. Burhan Abdullayev və Baratəli Səlimzadə isə 2-3-cü yerləri bölüşüblər.

Gənclər, U-23 və elit yaş kateqoriyasında çıxış edən velosipedçilərin mübarizəsində Musa  Mikayılzadə hamıdan güclü olub. Şahin Eyvazov və Kamran Mirzəxanov isə müvafiq olaraq gümüş və bürünc medallara layiq görülüblər.