Forgot Password New Account
Gəzən xəbər

“Mən də bu uğuru Azərbaycan ordusuna həsr edirəm!”

Ağırlıqqaldırma
18 noyabr 2020 / 16:16 Baxış sayı: 307

Peruda yeniyetmə ağırlıqqaldıranların dünya kubokunda başa çatıb. Allsport.az saytı xəbər verir ki, 102 kq-da Əli Şükürlü 2-ci olub. İdmançımız tarixi uğurun sevincini belə bölüşüb: “Bütün çətinliklərə rəğmən bu medalları qazana bilməyim məni çox sevindirir. Birdən qaldırmada qızıl, təkan və toplamda gümüş böyük nəticədir və pandemiya şəraitində buna nail olmağıma xüsusilə şadam.

Hazırlıqlarımız çox çətin keçdi. Sumqayıtda ev şəraitində məşq edirdim, təlim-məşq toplanışlarımız yox idi. Sağ olsun məşqçilərim Ağalar Muxtarov, Oktay Muxtarov və Emil Əliyev ruhdan düşməyimə imkan vermədilər. Məhdud imkanlarla çalışmalarımı davam etdirdim, formamı qorudum və inkişaf etdirdim. Dünya kubokunda bu medalları qazanmağım bütün əziyyət və əməyimizin bir əvəzi oldu. Atama da təşəkkür edirəm ki, mənə çox dəstək oldu, inandı. Onu da bu uğurum münasibətilə təbrik edirəm. Cəbhədəki qələbəmizdən sonra bu əlavə bir sevinc oldu. Mən Qubadlıdanam.

Ali baş komandan İlham Əliyevin rəhbərliyi altında müzəffər ordumuzun torpaqlarımızı işğaldan azad etməsi böyük bir bayram idi. Ata-baba torpaqlarımız geri qayıtdı və biz ərazi bütövlüyümüzü təmin etdik. Mən də bu uğuru Azərbaycan ordusuna həsr edirəm! Hər bir əsgərimizə təşəkkür edirəm ki, bizə belə xoş hissləri yaşatdılar. Mən də bir idmançı kimi bu qələbəyə əlavə töhfəmi verə bildiyimə görə şadam. İnanıram ki, uğurlarımız davamlı olacaq. Qarabağ bizimdir, Qarabağ Azərbaycandır!”  

Həmin kateqoriyadan