Maestro Niyazi ağırlıqqaldırma federasiyasının prezidenti, çempion və rekordçu olub

Azərbaycanın məşhur dirijoru və bəstəkarı maestro Niyazi gənc yaşlarında ağırlıqqaldırma ilə məşğul olub. Allsport.az saytı xəbər verir ki, o, “Dinamo” cəmiyyətinin yarışlarında qalib olub, 16-18 yaşlarında yüngül çəkilərdə Bakı və Azərbaycan çempionatlarında iştirak edib, yüksək nailiyyətlər əldə edib.

Sonradan konservatoriyaya daxil olan və əsasən musiqi ilə məşğul olan incəsənət xadimi idmandan ayrılmayıb. Niyazi II dünya müharibəsindən sonra 1948-1955-ci illərdə Azərbaycan SSR səhiyyə nazirliyinin bədən tərbiyəsi və idman idarəsinin respublika ağır atletika bölməsinin sədri (indi analoji vəzifə Azərbaycan ağır atletika federasiyasının prezidentidir) vəzifəsində çalışıb.

Ona həmçinin Azərbaycan SSR səhiyyə nazirliyinin bədən tərbiyəsi və İdman İdarəsinin tərəfindən ağır atletika idman növü üzrə respublika dərəcəli hakim adı da verilib. Uzun müddət bu postu tutan maestro bir çox idmançının yetişməsinə, onların İttifaq və beynəlxalq səviyyəli yarışlara qatılmasına kömək edib.

Şəkillərdən biri 1929-cü ildə ağırlıqqaldırma üzrə ümumi Bakı ictimai yarışında iştirakı zamanı, 2-ci yeri tutduğuna görə Bakı bədən tərbiyəsi şurası tərəfindən ona verilən diplomdur.

Həmin kateqoriyadan