“Qarabağ”ın 3 nümayəndəsinə AİJA-nın mükafatı təqdim edildi

Azərbaycan idman jurnalistləri assosiasiyası müxtəlif nominasiyalar üzrə 2021-ci ilin ən yaxşılarının mükafatlandırma mərasimini keçirib. Allsport.az saytı xəbər verir ki, “Qarabağ”ın baş məşqçisi Qurban Qurbanova “ilin məşqçisi”, idman direktoru Əmrah Çəlikel “ilin idman xadimi” mükafatına layiq görülüb. Klubun baş meneceri Asif Əsgərova isə “ilin futbol klubu” mükafatı təqdim edilib.

Tədbirdə 2-ci Vətən müharibəsi qəhrəmanı şəhid baş leytenant Səid Rəşidzadənin atası komandamızın baş məşqçisi Qurban Qurbanova oğlunun hərbi baş geyimini və poqonlarını hədiyyə edib. Mütətəssis, bu anlamlı və dəyərli hədiyyəyə görə təşəkkürlərini çatdırıb, minnətdarlığını bildirib, Vətən uğrunda canlarını fəda edən bütün şəhidlərimizin, o cümlədən də Səid Rəşidzadənin xatirəsinin daim xalqımızın qəlbində yaşayacağını qeyd edib.

Tədbirdə həmçinin mərhum jurnalist Elnur Əşrəfoğlunun oğlu Mətinə “Qarabağ”ın köynəyi və konfrans liqasının imzalı topu hədiyyə olunub.