“Rəqib haqqında ətraflı bilgi verməyi sevmirəm”

Sabah “Qarabağ” Avropa liqasının əsas mərhələsinin 5-ci turunda evdə Fransanın “Lion” klubunu qəbul edəcək. Allsport.az saytı xəbər verir ki, bu gün Tofiq Bəhramov adına respublika stadionunda mətbuat konfransında baş məşqçimiz Qurban Qurbanov bunu dedi:

“Rəqiblə maraqlanmışıq, heyətinə nəzər yetirib oyunlarına baxmışıq. “Lion”da böhran var. Amma böyük klublar üçün faciə deyil. Bu durumda 1-2 səviyyəli futbolçusunu satıb vəziyyətdən çıxırlar.

Həmişə çalışmışıq ki, öz bacardığımızı daha yaxşı şəkildə göstərək. Hər komandanın özünəməxsus üslubu olur. Biz bu detallara diqqət yetirməliyik.

Ümumiyyətlə, rəqib haqqında ətraflı bilgi verməyi sevmirəm. Üstünlüyümüz kollektiv oyun nümayiş etdirməyimizdir. “Lion” səviyyəcə irəlidədir – yaxşı çempionatda iştirak edir. Amma biz də boş dayanmayacağıq”.