“Bütün diqqətimizi Yunanıstanla oyuna yönəltmişik”

17 yaşadək futbolçulardan ibarət Azərbaycan komandası Avropa çempionatının seçmə mərhələsində 6-cı qrupun I turu çərçivəsində Macarıstan yığmasına məğlub olub – 4:0.

Allsport.az xəbər verir ki, millinin baş məşqçisi İlham Yadullayev oyun haqda fikirlərini bildirib:

“Rəqib güclü komanda idi. Buna baxmayaraq, oyuna çox yaxşı hazırlaşmışdıq. Əsas problemlərdən biri ilk dəqiqələrdə ardıcıl iki qol buraxmağımız oldu. Bu, matçın gedişatına da təsir göstərdi. Oyunu çevirməyə, hücumlarda çox iştirak etməyə çalışdıq. Ancaq həmin anlarda üçüncü qolu buraxdıq. İkinci hissədə üstünlük bizim tərəfimizdə idi, qol imkanları da yaradırdıq. Təəssüf ki, rəqib əks-hücumdan dördüncü qolu vurdu. Ümumilikdə uşaqlar yaxşı oyun nümayiş etdirməyə çalışdılar. Macarıstanla görüşü yaddan çıxarıb, qarşıdakı iki matça hazırlaşacağıq. Artıq bütün diqqətimizi Yunanıstanla oyuna yönəltmişik. Həmin qarşılaşmada uğurlu nəticə qazanmaq üçün əlimizdən gələni edəcəyik”.
U-17 millimizin Yunanıstanla oyunu noyabrın 16-da, Bakı vaxtı ilə saat 14:00-da Rumıniyanın “Tunari” stadionunda keçiriləcək.