Forgot Password New Account

“Neftçi” klubunun muzeyi və azarkeş mağazası açılıb

Futbol
22 aprel 2017 / 11:00 Baxış sayı: 1577

Bu gün “Neftçi” komandasının muzey və fanşop layihələri həyata keçirilib. Allsport.az saytı xəbər verir ki, klubun muzeyi iki otaqdan ibarətdir. Muzeyi ziyarət edənlər ilk otaqda komandanın yaranma tarixi ilə tanış ola bilərlər. Burada “ağ-qaralar”ın yaranma tarixi ilə bağlı maraqlı məlumatlar, şəkillər və həmin dövrlərə aid eksponatlar (top, buts) yer alıb. Girişdə qonaqlar klubun SSRİ çempionatlarında geyindiyi formalar və müstəqillik dövründə qazanılmış kubokları (“Birlik kuboku”, çempionluq kuboku, ölkə kuboku) görə bilərlər. 1966-cı ilə aid stenddə komandanın SSRİ çempionatında qazandığı bürünc medal, həmçinin, həmin mövsüm mükafatlara layiq görülmüş əfsanəvi heyəti haqqında məlumatlar var.

İkinci otaqdakı stendlərdə xalq komandasına dövlət qayğısı, ümummmilli lider Heydər Əliyevin “Neftçi”nin üzvləri ilə görüşü, prezident İlham Əliyevin komanda üzvlərini qəbul etməsi haqqında video və foto materiallar yer alıb. Bundan başqa, qonaqlar “Neftçi”nin beynəlxalq arenadakı çıxışları barədə məlumatlana, komandanın Avropa Liqasındakı rəqiblərinin rəmzləri ilə tanış ola bilərlər. İkinci otaqda klubun strukturu və ona rəhbərlik etmiş şəxslər, eləcə də azarkeşlər haqqında guşələr yaradılıb.

Muzeyi ziyarət edən qonaqlar buradan fanşopa birbaşa daxil olurlar. Fanşopda ziyarətçilər komandanın hazırkı geyimlərini və rəmzlərini əldə etmək imkanı qazanırlar. Əlavə olaraq, “Neftçi”nin hazırkı heyəti ilə xatirə fotosu çəkdirmək də mümkündür. Tələb və təkliflər əsasında gələcəkdə klubun fanşopunda məhsul sayının və çeşidlərinin artırılması nəzərdə tutulub.

“Neftçi”nin muzey və fanşopu 01.05.2017-ci il tarixindən ictimaiyyətin ixtiyarına veriləcək. Muzey və fanşop oyun və bazar günləri istisna olmaqla, hər gün saat 10:00-dan 18:00-dək fəaliyyət göstərəcək. Muzeyə girişin qiyməti 2 AZN olacaq. 7 yaşadək uşaqların girişi ödənişsizdir.

Həmin kateqoriyadan