Flavinyo Azərbaycanı tərk etdi

“Neftçi” ilə yollarını ayıran braziliyalı yarımmüdafiəçi Flavinyo Azərbaycanı tərk edib. Allsport.az xəbər verir ki, onu Heydər Əliyev adına Bakı hava limanından azarkeşlər yola salıblar.

Beş il sevindirdiyi “Neftçi” fanatları onu layiqli şəkildə yola salmağa çalışıblar. Flavinyo onların hər biri ilə görüşüb, sağollaşıb. Fanatlar ona gələcək karyerasında uğurlar arzulayıblar. Braziliyalı futbolçu da belə isti münasibətə görə onlara təşəkkürünü bildirib.

Qeyd edək ki, Flavinyo “Neftçi” ilə üç dəfə Azərbaycan çempionu olub, iki dəfə ölkə kubokunu qazanıb. O, bütövlükdə paytaxt klubunda 174 oyun keçirib, 38 qola imza atıb.