“Hər zaman yerli futbolçulara güvənmişik”

“Araz-Naxçıvan” premyer liqanın 3-cü turunda “Qəbələ”ni məğlub edib – 2:1.

Allsport.az xəbər verir ki, oyundan sonra təşkil olunan mətbuat konfransında Naxçıvan təmsilçisinin baş məşqçisi Elmar Baxşıyev bunu deyib: “Qəbələ” yaxşı komandadır. Son iki oyunda bunu göstərdilər. Ağır oyun oldu. Üstünlük bəzən bizdə, bəzən isə rəqib tərəfdə olurdu. Əzmkar qələbə qazandıq. Komandanı təbrik edirəm. 

Coşqun Diniyev istədiyim futbolçudur. Onun transferi komandamıza faydalı olacaq. Ona inanırıq. 

Hər zaman yerli futbolçulara güvənmişik. İkinci hissədə 6-7 yerli futbolçu meydanda idi. Həm yaxşı yerli, həm də güclü legionçu futbolçularımız var. Futbolçunu yerli və legionçu deyə seçmirik. Kim oyuna hazır olursa, ona da şans veririk. 

Süleyman gənc qapıçıdır. Üzərində işləməlidir. Bu gün premyer liqada oynamağa hazır deyil, amma perspektivli qapıçıdır.

Roman Maçado məşqlərə başlayıb. Ümid edirik ki, millinin oyunları ilə əlaqədar yaranmış fasilədən sonra o da komandamıza qoşulacaq”.