“İllər boyu birgə çalışdığın komanda yoldaşlarınla üz-üzə gəlmək ayrı hisdir”

Şahmat üzrə tarixi Azərbaycan çempionatında qadınlar arasında qalib adını Günay Məmmədzadə qazandı. Allsport.az saytı xəbər verir ki, o, finalda Gövhər Beydullayevanı tay-brekdə üstələdi. Titullu idmançı bağlanış mərasimində təəssüratını mətbuatla bölüşdü:

“Yarış çox maraqlı keçdi. Olimpiya sistemi ilə oynayırdıq. Burada uduzan rəqabəti tərk edirdi. Millinin üzvləri və digərləri özlərini yaxşı tərəfdən göstərməyə çalışdılar. Mənə görə çətin yarış oldu. Hər görüş bir-birindən maraqlı idi. Özəlliklə, tay-brekdə. Şadam ki, sonda çempionluğu bayram etdim.

Sözsüz ki, asan heç nə olmur. İllər boyu birgə çalışdığın komanda yoldaşlarınla üz-üzə gəlmək ayrı hisdir. Amma bu oyundur, biz peşəkarıq, hər kəs burada özü üçün çıxış edirdi. Mən də qalib olacağıma inanırdım”.