“Kəpəz” “Neftçala” üzərində qələbəyə sevindi

Həftəsonu startı veriləcək çempionata səylə hazırlaşan “Kəpəz” avqustun 3-də yoxlama oyunu keçirib. Allsport.az xəbər verir ki, Gəncə klubu Azərbaycan Dövlət Bədən Tərbiyəsi və İdman Akademiyasının stadionunda I divizionun son qalibi “Neftçala” ilə üz-üzə gəlib.

FİFA referisi Əliyar Ağayevin idarə etdiyi oyunu üstün keçirən Gəncə təmsilçisi bunu hesabda da əks etdirib. Gəncəlilər hər hissədə bir qol vuraraq 2:0 hesabı ilə qalib gəlib. İlk yarıda Azad Kərimov fərqlənib. İkinci hissədə “Kəpəz”in digər yeni transferi olan ukraynalı hücumçu Aleksandr Sitnik dəqiq zərbə ilə diqqət çəkib.

Qeyd edək ki, “Neftçala”ya qarşı oyun gəncəlilərin mövsüm öncəsi son hazırlıq matçı olub.