“Minifutbol üzrə Avropa çempionatında qələbə, idman ölkəsi kimi qazanılan uğurların davamıdır”

Slovakiyanın Koşitse şəhərində minifutbol üzrə Avropa çempionatında komandamız baş mükafata yiyələnib. Allsport.az saytı xəbər verir ki, İslam həmrəyliyi idman federasiyasının icraiyyə komitəsinin azərbaycanlı üzvü Könül Nurullayeva bu qələbəni yüksək qiyməyləndirib:

“Azərbaycan bu gün regional məsələlərin müzakirə edildiyi, beynəlxalq tədbirlərin keçirildiyi mərkəz olmaqla yanaşı idman ölkəsi kimi də mövqelərini möhkəmləndirir. Milli komandamızın Slovakiyada keçirilmiş minifutbol üzrə Avropa çempionatında qalib gəlməsi idman ölkəsi kimi qazandığımız uğurların davamıdır.

Ölkə başçısı İlham Əliyev komandamızın üzvlərini Slovakiyada möhtəşəm qələbədən sonra qəbul etdi. Azərbaycan prezidentinin də qeyd etdiyi kimi, ölkəmizdə idmanın inkişafı üçün dövlət tərəfindən bütün şərait yaradılıb. Ancaq minifutbol idman növü, nisbətən yeni idman növü olduğuna görə bu sahədəki nailiyyətləri məhz komanda özü qazanıb. Burada isə təbii ki, komanda ruhu və vətənpərvərlik hissi əsas rol oynayır”.