Namiq Abdullayev yenə əlçatmaz oldu

Tokio-2020 artıq tarixin yaddaşına köçdü. XXXII yay olimpiya oyunlarında bizimkilər 3 gümüş və 4 bürünc medalla mübarizəni 67-ci yerdə bitirdi. Allsport.az saytının məlumatına görə, fəxri kürsü sevincini cəmi 93 ölkə yaşadı. Maraqlıdır ki, 2000-ci ildə Sidneyə bayraqdar kimi yollanan, orada “gümüş”ünü “qızıl”a çevirən Namiq Abdullayevin hər 2 istiqamətdə uğuru, nəinki təkrarlandı, ona heç yaxın düşən olmadı.

Düzdür, Rio-2016-da 2-ci yer tutan Toğrul Əsgərovun da əyarı əfsanəvi sərbəst güləşçi ilə eynidir, amma 28 yaşlı gəncəli idmançı dünya çempionatında 1 final və 1 Avropa çempionluğu həyacanı yaşayıb. Namiqdə isə, 3 dünya 2-ciliyi və 3 Avropa qızılı; üstəlik, dünya kubokuna sahiblənib. Hazırda onun yüksək hazırlıq səviyyəsindən uzaq olduğunu nəzərə alsaq, bu yaxın illərdə dünya çempionatında nəinki 1-ci yer tutması, heç iştirakı inandırıcı görünmür.

Olimpiadalarda böyük uğur qazanan stend atıcısı Zemfira Meftəhədinova (1 qızıl, 1 bürünc), yunan-Roma güləşçisi Fərid Mansurov (1 qızıl), cüdoçu Elnur Məmmədli (1 qızıl), “klassik” üsulda Rövşən Bayramov (2 gümüş) və sərbəst güləşçi Hetaq Qazyumov (1 gümüş, 2 bürünc) karyeralarını başa vurduqlarından, onların nəticələrini yaxşılaşdıra bilməyəcəkləri dəqiqdir.

Buna şərti imkanı qalan sərbəst güləşçi Şərif Şərifov (1 qızıl, 1 bürünc), taekvondoçu Radik İsayev (qızıl) və qadın güləşçi Mariya Stadnik (2 gümüş, 2 bürünc) çıxışlarını dayandırmamalıdırlar. Adı ilk və 3-cü çəkilən legionçuların 32, digərinin 31 yaşları var. Paris-2024 isə, Allah qoysa, 3 ildən sonra başlayacaq. Ona qədər bu idmançıların peşələrində qalıb-qalmayacaqları bilinmir.

Rio-2016-da gümüş medala sahib çıxmış avarçəkən Valentin Demyanenkonun (37 yaş) medal boxçasında 4 dünya və 3 qitə çempionluğu olsa da, o, olimpiadadan sonra vətəni Ukraynaya dönüb, karyerasını başa vurub.

Həmin oyunlarda 2-ci yer tutan cüdoçu Rüstəm Orucovla (29 yaş) Elmar Qasımov (30 yaş), eləcə də boksçu Lorenso Sotomayor (36 yaş) Tokio-2020-də əliboş qaldılar. Onlar dönəmlərinin qürub cağını yaşayırlar, üstəlik hesablarında “dünya qızılı” da yoxdur.

Tokio-2020-də karatedə gümüş medal qazanan Rəfael Ağayevlə İrina Zaretskanın dünya və qitə çempionluğu olmasına rəğmən, bu idman növünün Paris-2024-ə proqrama salınacağı sual altındadır.

Yaponiyada finala çıxmaqla, Rio-2016-dakı (bürünc) nəticəsini yaxşılaşdıran sərbəst güləşçi Hacı Əliyev çətin ki, növbəti dördilliyə qala. Hazıra onun 30 yaşı var və açıqlamasında karyerasına yaxın gələcəkdə son qoyacağını eyhamlayıb.

Kamran HACI