“Neftçi” İqor Getmanla anlaşmanı 1 il artırıb

Yeni mövsümdə əsas komandaya rəhbərlik edəcək Roberto Bordinin daha bir köməkçisinin adına aydınlıq gəlib. Allsport.az saytı xəbər verir ki, ötən mövsüm də bu vəzifəni yerinə yetirən İqor Getmanla müqavilə 1 il müddətinə artırılıb.

O, 1991-1992, 1998-2007-ci illər ərzində “Neftçi”də çıxış edib, 236 oyun keçirib, 7 qol vurub. Flaqmanın heyətində Azərbaycan çempionatının (1992, 2004, 2005), ölkə kubokunun (1999, 2004) qalibi olan İqor, müstəqillik dönəmində komandamızda ən çox oyun keçirən futbolçudur. 1995-2001-ci illər ərzində Azərbaycan milli komandasının heyətində 24 oyunda meydana çıxıb.

Bunadək də əsas komandada məşqçi, əvəzedici heyətdə isə baş məşqçi vəzifələrində çalışan 47 yaşlı mütəxəssis UEFA-nın “A” kateqoriyalı məşqçisidir. Qeyd edək ki, İqor Getmanla yanaşı, Füzuli Məmmədov, Etibar Tarıverdiyev (qapıçılar üzrə) və Andrea Vezzu (fiziki hazırlıq üzrə) da baş məşqçi Roberto Bordinə kömək edəcəklər.