“Qarabağ”ın rəqibi dördüncü cəhdində sevindi

İsveçrə çempionatında 4-cü turun oyunları keçirilib. Allsport.az xəbər verir ki, Avropa Liqasının pley-off mərhələsində Azərbaycan çempionu “Qarabağ”ın rəqibi olan “Yanq Boyz” da növbəti matçına çıxıb.

Sözügedən komanda doğma meydanda “Tyun”la qarşılaşıb. Matç meydan sahiblərinin 3:1 hesablı qələbəsiilə başa çatıb. Ağdamlıların rəqibinin heyətində Milan Vilotiç (13-cü dəqiqə), Milan Qayiç (45) və Haris Tabakoviç (84) fərqlənib.

Qeyd edək ki, bu qələbə “Yanq Boyz”un cari mövsümdəki ilk qələbəsi olub. Komanda bundan əvvəlki hər üç oyununda heç-heçə etmişdi. “Qarabağ”ın rəqibi hazırda 6 xalla turnir cədvəlinin 3-cü pilləsində qərarlaşıb.

“Qarabağ”la “Yanq Boyz” arasındakı ilk oyun avqustun 20-də Berndə, cavab matçı isə ayın 27-də Bakıda keçiriləcək.