Ərmin Zets: “Zirə” yaxşı oyun nümayiş etdirir

Bu həftə Topaz Premyer Liqasında 9-cu turun oyunlarına yekun vurulacaq. Allsport.az saytı xəbər verir ki, ilk dövrənin son turunda “Qəbələ” klubu debütant “Zirə” ilə qarşılaşacaq. “Qırmızı-qaralar”ın bosniya və herseqovinalı hücumçusu Ərmin Zets bu oyun ilə bağlı fikrini açıqlayıb:

“Çətin və maraqlı oyun olacaq. Çünki “Zirə” debütant olmasına baxmayaraq, cari mövsümdə yaxşı oyun nümayiş etdirir. Düşünürəm ki, futbolçuların ustalıq səviyyəsinə görə rəqibdən üstünük. Həm də dövrənin son qarşılaşmasını öz meydanımızda keçirəcəyik.

Bu görüşdə qələbə qazanmalıyıq. Çünki azarkeşlərimiz önündə 3 xal əldə etməliyik. Bizim üçün bu xallar vacib olduğundan qalib gəlməliyik. Bunun üçün bacarığımızı ortaya qoyacağıq. Qalib gəlmək üçün öz oyunumuzu nümayiş etdirməliyik”.