AFFA 3 klubu cərimələyib

Bu gün AFFA intizam komitəsinin iclası keçirilib. Allsport.az saytı xəbər verir ki, premyer liqanın 24-cü turunda qayda pozuntuları barədə qərarlar verilib.

“Şamaxı”nın futbolçusu Franko Floresi bir oyunluq cəzalandırıb. Buna səbəb 29 yaşlı müdafiəçinin “Sabah”a 1:5 hesabı ilə uduzduqları oyunda qırmızı vərəqə alaraq meydandan qovulması olub. Həmçinin klub 200 manat cərimələnib. “Şamaxı”nın 4 futbolçusu sarı vərəqə ilə cəzalandırıldığı üçün klub ümumilikdə 800 manat cərimələnib.

“Neftçi”nin oyunçusu Ömər Buludova da 1 oyunluq komandasına kömək edə bilməyəcək. 24 yaşlı müdafiəçi “Səbail”ə səfərdə görüşündə (1:0)  ikinci sarı vərəqəni alaraq meydandan qovulub. Paytaxt təmsilçisi 200 manat ziyana düşüb. 

“Sabah” – “Şamaxı” oyununda oyun öncəsi dövlət yanğından mühafizə xidməti nümayəndəsi təyin olunan vaxtda iclasda iştirak etmədiyi üçün meydan sahibi klub 400 manat cərimə olunub. 

“Qəbələ” – “Qarabağ” oyununda dövlət yanğından mühafizə xidməti maşını oyuna təyin olunan vaxtdan gec gəldiyi üçün meydan sahibi kluba xəbərdarlıq edilib.

“Qarabağ” isə azarkeşlərin pirotexniki vasitələrdən istifadə etdiyi üçün 800 manat cərimələnib.