Ardıcıl 8-ci dəfə

Azərbaycan premyer liqasında qış çempionu XIII turda müəyyənləşib.

Allsport.az xəbər verir ki, “Qarabağ” ilin son turu ərəfəsində qış fasiləsinə 1-ci pillədə yollanmağı təmin edib.

Ağdam klubu “Sabah”ı 5:1 hesabı ilə məğlub edərək izləyiciləri üçün əlçatmaz olub. Qurban Qurbanovun baş məşqçi olduğu komandanın 30 xalı var. “Köhlən atlar” “Qəbələ”ni 5 xal qabaqlayır.

Ağdamlılar ölkə çempionatları tarixində 8-ci dəfə yeni ili lider kimi qarşılayacaq. 8 qat ölkə çempionu 2004/05, 2013/14, 2014/15, 2015/16, 2016/17, 2017/18, 2019/20 mövsümlərində də ilk yarını zirvədə tamamlayıb.

Bu göstəricidə rekord “Neftçi”yə məxsusdur. Bakılılar 9 dəfə (1994/95, 1996/97, 2000/01, 2001/02, 2003/04, 2010/11, 2011/12, 2018/19, 2020/21) qış çempionu olublar. 2 komandanın aktivində üç belə uğur var. “Kəpəz” 1993/94, 1997/98, 1998/99, “İnter” adlandığı dövrdə “Keşlə” 2008/09, 2009/10, 2012/13 mövsümlərinin fasiləsinə lider kimi yollanmağa nail olub.

Digər 5 mövsümdə fərqli komandalar belə uğur qazanıb. Bunlar “Xəzri” (1995/96), “Şəmkir” (1999/2000), “Karvan” (2005/06), “Xəzər Lənkəran” (2006/07) və “Olimpik” adlandığı dövrdə “Şüvəlan”dır (2007/08).

1992 və 1993 mövsümləri yaz-payız sistemi ilə keçirildiyindən qış çempionu olmayıb.