Azərbaycan millisinin ən bahalı futbolçuları kimlərdir?

Azərbaycan millisi DÇ-2018-in seçmə mərhələsində uğurlu çıxışı ilə son günlər diqqət mərkəzindədir. Allsport.az saytı xəbər verir ki, futbolçularımız arasında fərdi göstəricilərinə görə də irəli gedənlər, geyiləyənlər var. Bu, onların bazardakı qiymətinə də təsirsiz ötüşmür. Həmin yazıda da məhz “ay-ulduzlular”ımıza dəvət alanların transfer qiymətlərindən söz açacağıq.

Yığma üzvləri arasında son bir ilə əsasən qiymətini ən çox artıran Bədavi Hüseynovdur. 25 yaşlı müdafiəçi qiymətini 450 000 avrodan 700 000-ə qaldırıb. Onu 350 000-dən 500 000 avroya qədər bahalaşan Maksim Medvedev izləyir.
Araz Abdullayev 400 000 avro idisə, indi onun transfer qiyməti 500 000 avro göstərilir. Qara Qarayev isə elə əvvəlki qiymətindədir – 500 000 avro.

Qara Qarayev kimi, Səlahət Ağayevlə Məhəmməd Mirzəbəyov da “sabitlərdəndir”. Bu iki oyunçu əvvəlki kimi, 400 000 avro dəyərindədir.
Əfran İsmayılov qiymətini 50 000 avro bahalaşdırmağı bacarıb və indi onun transfer dəyəri 350 000 avro həddindədir.
Ruslan Abışov 400 000 avrodan 350 000-ə düşüb.

Arif Daşdəmirov da geriyə gedənlərdəndir. 100 000 avro ucuzlaşan bu futbolçunun transfer qiyməti 300 000 göstərilir.
Ruslan Qurbanovla Namiq Ələsgərov da 300 000 avroyadır. Birinci 150 000, ikinci isə 200 000 avroluq yüksəlişə nail olub.
Ağabala Ramazanov 150 000 avroluq bahalaşaraq, indi 250 000 avro dəyərindədir. Rahid Əmirquliyevdə də qiymət 250 000 avrodur, amma o, bu baxımdan 100 000 avro “itirib”.

Rauf Əliyevdə də qiymət 250 000 avrodur. O, əvvəlki səviyyəni qoruyub.
Rəhman Hacıyev də 200 000 avroluq dəyərini qoruyub saxlayıb. Amma kapitan Rəşad Sadıqov 300 000 avrodan 100 000 “itirib”.
Tərlan Quliyev dəyişməz olaraq qalıb – 150 000 avro. Anar Nəzirov isə 50 minlik geriləmə ilə Quliyevin qiymətinə düşüb.

Qeyd edək ki, materialın hazırlanmasında daha çox “Transfermarkt” portalının, eləcə də digər mənbələrin məlumatlarından istifadə olunub.