“Milan” Modriçi karyerasını bitirməməyə razı salmaq istəyir

“Milan”ın rəhbərliyi xorvatiyalı yarımmüdafiəçi Luka Modriç ilə müqaviləni uzatmaq variantını aktivləşdirməyi planlaşdırır.

Allsport.az xəbər verir ki, “rossoneri” rəhbərliyi 40 yaşlı ulduzu komandanın açar oyunçusu hesab edir. Hazırda klub nümayəndələri Lukanı DÇ-2026-dan sonra da futbolda qalmağa razı salmağa çalışırlar. Əgər tərəflər razılığa gəlsə, “Milan” müqaviləni 2027-ci ilə qədər uzadacaq.

“Qızıl top”un (2018) sahibi bu ilin sentyabrında 41 yaşını qeyd edəcək. Modriç daha əvvəl verdiyi açıqlamalarda dünya çempionatından sonra karyerasını bitirməyi planlaşdırdığını bildirmişdi.