Azərbaycan yerində saydı, amma xal ehtiyatı yaxşılaşdı

Avropa Liqasının qrup mərhələsinin ötən gecə baş tutan beşinci turunun oyunları Azərbaycanın UEFA reytinqindəki mövqeyinə təsir göstərməyib. Allsport.az xəbər verir ki, ölkəmiz bu siyahıda əvvəlki yerini qoruyub.

Qeyd edək ki, Azərbaycanı qitənin nüfuzuna görə ikinci dərəcəli klub turnirində “Qarabağ”la “Qəbələ” təmsil edir. Ağdam klubu ötən gecə doğma meydanda İngiltərə “Tottenhem”i ilə qarşılaşdı və 0:1 hesablı məğlubiyyətlə üzləşdi. Qəbələnin eyniadlı təmsilçisi isə səfərdə Yunanıstanın PAOK klubu ilə qarşılaşdı və 0:0 hesablı heç-heçəyə razılaşdı. Nəticədə, “Qarabağ” bu dəfə ölkəmizə xal qazandıra bilməsə də, “Qəbələ” Azərbaycanın UEFA reytinqindəki xal ehtiyatını 0.250 balla zənginləşdirdi.

Hazırda UEFA reytinqində 54 ölkə arasında 26-cı pillədəyik. Azərbaycanın hesabında 14.875 reytinq xalı var ki, onun da 4.375 xalı cari mövsümdə qazanılıb (“Qarabağ” – 1.750, “Qəbələ” – 1.625, “İnter” – 0.750, “Neftçi” – 0.250).

Onu da əlavə edək ki, klublarımızın təsnifat mərhələsindəki istənilən qələbəsi Azərbaycana 0.250 reytinq xalı qazandırırdısa, heç-heçə 0.125 xal verirdi. Qrup mərhələsində isə heç-heçə 0.250, qələbə 0.500 xalla qiymətləndirilir.