RƏSMİ

Azərbaycanda futbol mövsümü bərpa edilir

Azərbaycanda futbol mövsümü davam etdiriləcək. Allsport.az PFL-in saytına istinadən xəbər verir ki, mayın 21-də I divizion, mayın 23-də isə premyer liqanın bərpası planlaşdırılır. Peşəkar futbol liqasının yaydığı açıqlamada qeyd olunur:

Dünyanın əksər ölkələrində geniş yayılmış koronavirus (COVID-19) pandemiyası ilə əlaqədar premyer liqa, 1-ci divizion və Azərbaycan kubokunda müvəqqəti olaraq fasilə verilib. Ölkəmizdə pandemiyaya qarşı aparılan uğurlu mübarizənin nəticəsi olaraq, nazirlər kabineti yanında operativ qərargah 2020-ci il aprelin 27-dən etibarən xüsusi karantin rejiminin müəyyən qədər yumşaldılması barədə qərar qəbul edib.

Əvvəl qəbul olunmuş qərara əsasən, xüsusi karantin rejimi 4 may saat 00:00-da başa çatacağı təqdirdə, PFL-in təşkilatçılığı ilə keçirilən yarışların bərpası planlaşdırılır. UEFA, FIFA, EPFL və digər beynəlxalq futbol qurumlarının tövsiyələrini, AFFA, klublarıla aparılan müzakirələri və yarışların bitməsi üçün müəyyənləşdirilmiş mümkün tarixləri nəzərə alaraq, mayın 21-də 1-ci divizionun, mayın 23-də isə premyer liqanın bərpa olunması nəzərdə tutulur.

Aparılan müzakirələrə uyğun olaraq, PFL-in qərarına əsasən, premyer liqa oyunları başa çatdıqdan sonra Azərbaycan Kubokunun yarımfinal və final oyunları keçiriləcək.
Kubokun təqvimində dəyişikliyə əsas səbəb klubları onsuz da sıx olan təqvimdən qorumaq, kubokda iştirak etməyən klubların cari mövsümü erkən bitirərək növbəti mövsümə daha yaxşı hazırlaşmasına şərait yaratmaqdır.
Azarkeşsiz keçiriləcək premyer liqa, 1-ci divizion və Azərbaycan kubokunun yeni təqvimi ilə bağlı saytımızda məlumat yerləşdiriləcək.

Qeyd: Xüsusi karantin rejimi ilə bağlı mövcud vəziyyət hər hansı şəkildə dəyişəcəyi təqdirdə, Nazirlər Kabineti yanında Operativ Qərargahın qəbul edəcəyi qərarlara uyğun olaraq Peşəkar Futbol Liqası tərəfindən müvafiq qərarlar qəbul oluna bilər.