Bədavi Hüseynov: “Müdafiədə çox diqqətli olmalıyıq”

Dünən Bakı vaxtı ilə saat 21:30-da Azərbaycan yığma komandası çarter reysi ilə Şimali İrlandiyanın paytaxtı Belfasta çatıb. Allsport.az saytı xəbər verir ki, noyabrın 11-də bu ölkənin millisi ilə qarşılaşacaq “ay-ulduzlular”ımızda ovqat yüksəkdir. Hamı komandamızın səfərdən xalla dönəcəyinə inanır. Komandanın müdafiəçisi Bədavi Hüseynov da həmçinin:

“Biz Şimali İrlandiyaya ən azı 1 xal aparmaq üçün gəlmişik. Belfastdan qayıdanda aktivimizdə azından 8 xalın olmasını istəyirik. Rəqib çox güclüdür. Həm də doğma meydanda oynaması bizə əlavə çətinlik yaradacaq. Bundan başqa irlandlar fiziki cəhətdən güclü və hündürboydurlar. Belə komandalara qarşı oynamaq həmişə çətin olur. Oyunun taleyini standart vəziyyətlər həll edə bilər. Buna görə müdafiədə çox diqqətli olmalıyıq”.

Bir müddət əvvəl zədələnən və “Qarabağ”ın Avropa Liqasında PAOK-la son oyununda meydanda olan Bədavi artıq tam sağalıb. Amma digər müdafiəçimiz Rəşad Sadıqovun Bakıdakı son məşqdə zədələnməsi yerinə düşməyib. Rəşadın oynamayacağı təqdirdə müdafiənin mərkəzində kimlər yer ala bilər? Bədavi Hüseynovla söhbətdə o, Robert Prosineçkinin müdafiənin mərkəzində hansı futbolçulara şans verəcəyini bilmədiyini söyləyib:

“Mən zədəli olanda həmin mövqedə Rəşad Sadıqovla Maskim Medvedev oynamışdı. Düzü, Maksimin Çex Respublikası ilə oyundakı çıxışı məni yaxşı mənada heyrətləndirmişdi. İndiyə kimi demək olar ki, həmin mövqedə oynamamışdı. Amma bunu hiss etdirmədi. Maksim təcrübəli futbolçudur və təcrübəsinin köməyi ilə müdafiənin istənilən yerində oynaya bilər. Baş məşqçimiz bu dəfə də Maksimə müdəfiənin mərkəzində yer versə, heç kim təəccüblənməsin. Bu, əla seçim olardı”.

Sonda Bədavi Hüseynov “Qarabağ”ın futbolçularının hazırda yaxşı formada olduqlarını bildirməklə yanaşı PAOK üzərində qazanılan qələbələrin futbolçularda yüksək əhval-ruhiyyə yaratdığını və bunun yığmanın oyununa yaxşı mənada təsir edəcəyini deyib.