Bəybalayev futbolla vidalaşdı

Azərbaycanlı yarımmüdafiəçi Vüqar Bəybalayev 30 yaşında karyerasını bitirib.

Allsport.az xəbər verir ki, bu barədə o, sosial şəbəkə hesabında məlumat yayıb:

“Bəlkə də, bu günlərdə həyatımın ən çətin, bir o qədər də vacib qərarlarından birini verməli oldum. Ancaq öz-özümə “artıq vaxtıdır” – deyib belə bir qərar aldım. Bildirmək istəyirəm ki, bu gündən etibarən 6 yaşımdan başladığım və ömrümün 24 ilini həsr etdiyim peşəkar futbolçu karyeramı bitirirəm! 

Futbol mənə həyatımda saysız-hesabsız təcrübələr, möhtəşəm dostluqlar və hər zaman dəstəyini hiss etdiyim dəyərli insanlar qazandırdı. Yaşıl meydanlardan ayrılmağa qərar versəm də, futbolun mənə bəxş etdiyi sevinclər, öyrətdiyi təcrübələr, qazandırdığı dostlar, dəyərli insanlar bundan sonra da hər zaman mənimlə həyatımın geri qalanında qəlbimdə daim var olacaq.

Bu yolda oynadığım komandadan asılı olmayaraq bu günə kimi mənə dəstək olan azarkeşlərə, ilk gündən mənə inanan və güvənən ailəmə, daha da yaxşı olmağım üçün əziyyət çəkən hər kəsə təşəkkür edir, əziyyətləri qarşısında baş əyirəm!”

Xatırladaq ki, son olaraq “İrəvan”da çıxış etmiş Vüqar “Bakı”, “Turan Tovuz”, “Rəvan”, “Xəzər Lənkəran”, “Kəpəz”, “Sumqayıt”, “Səbail” kimi klubların formasını geyinib, Gürcüstan “Telavi”sində legionçu həyatı yaşayıb.