Bakı şəhər halqası yarış öncəsi KİV üçün seminar keçirib

Bakı şəhər halqası əməliyyat şirkəti, KİV nümayəndələri üçün
media mərkəzinin fəaliyyəti, akkreditasiya prosesi, jurnalist və fotoqrafların iş prinsipləri barədə seminar təşkil edib. Allsport.az saytı xəbər verir ki, toplantıda Formula-1 Azərbaycan qran-prisi haqqında ümumi məlumat, ölkəyə səfər edəcək komandaların heyəti, yarış təqvimi, təhlükəsizlik və COVİD-19 qaydaları haqqında məlumat verilib.

Ümumilikdə 100-ə yaxın yerli media nümayəndəsinin akkreditasiya müraciəti qeydə alınıb. Formula-1 Azərbaycan qran-prisi daxil olmaqla, bütövlükdə 2022-ci il yarışları üçün media nümayəndələrinin akkreditasiyası beynəlxalq avtomobil federasiyası və Formula One Management şirkəti tərəfindən tənzimlənir.

Bakı şəhərinin ev sahibliyi etdiyi Formula-1 Azərbaycan mükafat yarışı 10-12 iyunda baş tutacaq. Artıq 6-cı dəfə keçirilən ötüşmələr ötən ildən fərqli olaraq, tamaşaçıların iştirakı ilə olacaq.