BDU-da ümummilli liderin xatirəsinə futbol çempionatının püşkatması keçirilib

Bakı Dövlət Universiteti Tələbə Həmkarlar İttifaqı Komitəsinin ümummilli lider Heydər Əliyevin anadan olmasının 92 illiyinə həsr olunmuş ənənəvi fakültələrarası futbol çempionatının püşkatması keçirilib. Allsport.az saytı xəbər verir ki, mərasimdə BDU THİK-nin sədr müavini Şahin Şərifov, İdman klubunun rəhbəri Akif Atakişiyev, Fakültə Tələbə Həmkarlar Təşkilatlarının sədrləri və fakültələr üzrə komanda kapitanları iştirak edib.

Şahin Şərifov hər kəsi salamlayaraq tədbiri açıq elan edib və idmanın əhəmiyyətindən, Azərbaycanda idmana göstərilən diqqət və qayğıdan danışaraq, gənclərin sağlam yaşaması üçün universitetdə mütəmadi həyata keçirilən idman yarışlarından (futbol, həndbol, basketbol, şahmat və s.) söz açıb.

Sonra çıxış edən Akif Atakişiyev iştirakçılara çempionatın qaydaları, hakimlər briqadası haqqında geniş məlumat verib. Sonda püşkatma keçirilib və komandalar qruplara bölünüb. Beləliklə, çempionat gedişatında ilk oyunun tarixi müəyyən olunub.