Bizim oyunu ancaq uşaqlar izləyə biləcək

Azərbaycan millisi Macarıstanla səfər matçını stadionda 15 minə yaxın uşaq izləyəcək. 

Allsport.az xəbər verir ki, Macarıstan futbol federasiyası millimizlə oyunun baş tutacağı “Qroupama Arena”nı 14 yaşına çatmamış uşaqlarla doldurmaq üçün UEFA-nın intizam kodeksindən yararlanmaq qərarına gəlib.

UEFA Macarıstan millisinə bir oyunluq cəza verib. Lakin 14 yaşdan kiçik uşaqlar qarşılaşmanı tribunadan izləyə bilər. Federasiya beş gün ərzində, təxminən, 15 minə yaxın müraciəti qeydiyyata alıb. Bununla əlaqədar stadionun qapıları daha erkən açılacaq.

Macarıstan yığması azarkeşlərin sentyabrın 9-da Slovakiya ilə ev matçı zamanı irqçi davranışlara yol verməsi səbəbindən sanksiya ilə üzləşib. Qərarə əsasən, sözügedən kollektiv növbəti ev oyununu azarkeşsiz keçirməli, milli federasiya isə 67,125 avro cərimə ödəməlidi.

Qeyd edək ki, Macarıstan – Azərbaycan matçı oktyabrın 13-də baş tutacaq.