“Bu gün 70 faiz top bizdə idi”

Dünya Kuboku-2018-in seçmə mərhələsi çərçivəsində Tofiq Bəhramov adına Respublika stadionunda Şimali İrlandiya millisini qəbul edən “ay-ulduzlular”ımız uzatma dəqiqələrində oyunu uduzdu. Allsport.az saytı xəbər verir ki, görüşdən sonra baş məşqçimiz Robert Prosineçki bunu deyib:

“Çox danışmaq istəmirəm. Futbolda belə hallar olur. Bir komanda oynadı, digəri qələbə qazandı. Yəqin komandadan razı qalarsınız. Uşaqlar baxımlı oyun göstərdi. Bu gün 70 faiz top bizdə idi. Çox az səhv etdik.

Yalnız son dəqiqədə səhvə yol verdik və qol buraxdıq. 4 real qol şansımız var idi. Namiqi yıxdılar, hakim təhlükəli mövqedən cərimə zərbəsi vermədi. Mən komandamdan razı qaldım”.