Bu, İnzaqinin 7-ci kubokudur

Allsport.az xəbər verir ki, Simone İnzaqi məşqçilik karyerasında 3-cü dəfə İtaliya kubokunun qalibi olub.

47 yaşlı mütəxəssisin rəhbərlik etdiyi “İnter” həlledici oyunda “Fiorentina”nı 2:1 hesabı ilə məğlub edib.

Ümumilikdə italiyalının 7 kuboku var. “Latsio” ilə o, 2 İtaliya superkuboku (2017, 2019) və 1 ölkə kuboku (2019), “İnter”lə 2 superkubok (2021, 2022) və 2 ölkə kuboku (2022, 2023) qazanıb.

Bu mövsüm İnzaqinin 8-ci kuboku əldə etmək imkanı var. Bunun üçün “İnter” iyunun 10-da çempionlar liqasının finalında “Mançester Siti”ni məğlub etməlidir.