“Vaxtında fürsətləri dəyərləndirə bilmədik”

Premyer liqanın 22-ci turunda “Kəpəz” Qəbələdə “Səbail”ə 1:4 uduzub. Allsport.az xəbər verir ki, Gəncə klubunun baş məşqçisi Adil Şükürov mətbuat konfransında bunu deyib:

“İlk növbədə dəstəyə görə azarkeşlərə təşəkkür edirəm. Belə vəziyyətdə bizi tək qoymadılar. Sona kimi dəstək oldular. Oyuna gəlincə, qol epizodlarımız oldu. Vaxtında fürsətləri dəyərləndirə bilmədik. Rəqib isə əlinə düşən imkanlardan istifadə etdi. Bu oyunu unudub qarşıdakı matçlara hazırlaşmalıyıq. Çempionat uzundur. Çox işləməliyik, çalışmalıyıq.

Soyunub-geyinmə otağında bunu uşaqlara izah etdim. Belə oyunların olması bizə stimul verməlidir ki, daha yaxşı hazırlaşaq. Komandaya inanıram. Uşaqlar toparlanıb daha yaxşı futbol oynayacaqlar. Penalti epizodundan əvvəl künc zərbəsi zamanı rəqib futbolçu Amil Yunanovu açıq-aşkar itələdi. 11-metrlik ilə cərimə zərbəsi ilə bağlı heç bir etirazımız yoxdur. Sadəcə, bildirdik ki, baxılırsa, həmin epizoda da nəzər salınsın”.