Dieqo Souza: Hər oyuna eyni qaydada, eyni istək və həvəslə hazırlaşmışıq

“İkinci dövrənin son 3 oyunu göstərdi ki, komandamız yaxşı oynaya və qələbə qazana bilər. Elə ötən turda qalib gəlməklə bunu sübut etdik”. 

Allsport.az saytı xəbər verir ki, bu sözü “Kəpəz”in futbolçusu Dieqo Souza deyib. Legionçu “Sabah-2”yə qarşı görüşdə qələbəyə oynayacaqlarını söyləyib: “Məşqçilərə və komanda yoldaşlarıma inanıram. Ümid edirəm ki, çempionatda növbəti görüşdən də 3 xal götürə bilərik. Evdə azarkeşlərimiz önündə çıxış etməyimiz də bizim üstünlüyümüzdür. Bundan mütləq yararlanmalıyıq”.  
 
Yarımmüdafiəçi oyuna hazırlıqla da bağlı danışıb: “Məşq prosesi yaxşı keçib, futbolçular işə məsuliyyətlə yanışıblar. Ümumiyyətlə, hazırlığımız həmişə yüksək səviyyədə olub. Məğlub olmaq və ya heç-heçə oynamaq o demək deyil ki, komanda zəif məşq edib. Hər matça eyni qaydada, eyni istək və həvəslə hazırlaşmışıq.

Dieqo əvvəlki formasından uzaq olsa da, yavaş-yavaş faydalı iş əmsalını artırır. Son oyunlar da bunu göstərir: “Zədələr çox oldu və bu da çıxışıma təsirsiz ötüşmədi. İndi düzgün məşqlərin sayəsində zədələnmirəm, performansım get-gedə yüksələcək. Komandaya kömək etmək, daha çox faydalı olmaq istəyirəm”.