Elxan Məmmədovun yalançı təbliğatı

Futbol

3 aprel 2017 / 19:01 Baxış sayı: 1005

AFFA-nın baş katibi Elxan Məmmədov UEFA İcraiyyə Komitəsinə üzv olmaq üçün günləri sayır. Artıq təbliğat kampaniyası bitib və hamı seçkini gözləyir. Təbliğat işləri və özünə səs qazanmaq üçün Avropanı qarış-qarış gəzən Məmmədov xeyli iş gördü. Güman ki, ona yüksək səviyyədə dəstək də vəd edilib və Elxan bəy tezliklə arzusuna çatacaq. Ölkə futbolunda bərbad idarəçiliklə yadda qalsa da, heç olmasa, UEFA-da ölkəmiz adına önəmli işlər görəcəyinə ümid edirik.

Təbliğat kampaniyası dövründə Elxan Məmmədov bir çox işlər gördü. Xüsusən müxtəlif vasitələrlə mətbuatda çox tənqid olunmamasına səy göstərdi. Qitə futbol qurumu tərəfindən aparılan mediamonitorinqin nəticələrində müsbət imicli biri kimi görünmək üçün baş katib bir sıra müsahibələr də verdi.

Elxan bəyin ötən günlərdə “Insideworldfootball.com” saytına verdiyi açıqlamalar da bu qəbildəndi. Lakin həmin yazı daha çox təbliğat tiplidi və gerçəklər pərdə arxasında qalıb, yalançı parıltı gözə soxulub.

Baş katib AFFA-yə gəldikləri ilk vaxtlarda ölkə futbolunun durumu və sonrakı inkişaf mərhələləri barədə məlumat verib: “Bizə qədər Azərbaycan futbolunda struktur yox idi. Heç bir aşağı liqa yarışları təşkil edilmirdi. Avropanın da təcrübəsindən istifadə edərək, hər şeyi yenidən qurmağa başladıq. Sonra biz qadınların futbolla bağlı stereotiplərini qırdıq. Qadınlar arasında 17 yaşlıların Dünya Kubokunu keçirdik. Daha sonra kişilər arasında U-17 Avropa çempionatına ev sahibliyi etdik. Hazırda qeydiyyatda 8000 futbolçumuz var. 9-18 yaş arası bütün liqaları təşkil edirik”.

Elxan bəy düz deyir, lakin…

…Azərbaycan futbolunda qurulan struktur Məmmədovun xidməti deyil. 2000-ci illərin əvvəlinə kimi futbolumuzda maddi problemlər var idi. Yeni yaradılan AFFA dövlətin xoşlamadığı ögey övlad idi və ilk prezident Fuad Musayev onu ianələr hesabına yaşadırdı. Pul olmayan yerdə isə strukturdan, inkişafdan danışmaq yersizdi. Elə ki, AFFA-da hakimiyyət dəyişdi, işlərin yenidən qurulması da qaçılmaz oldu.

Məmmədov strukturun qurulmasını öz adına çıxmasın, bundan İcraiyyə Komitəsinə seçilmək naminə faydalanmasın! Dövlət futbolun inkişafı üçün elə bir şərait yaratdı ki, strukturun qurulmaması ağılsızlıq olardı. Hətta Fuad Musayev və ya başqa birisi daha çox şeyə nail olardı, Elxan bəy isə maksimum imkanlarla minimal işlər gördü, çürük bünövrənin təməlqoyanlarından oldu. Elə bu səbəbdən fantastik büdcə ilə hələ də ölkə futbolunu inkişaf etdirmək mümkün deyil, əksinə, bir az da geri getmişik.

…Bəli, ovaxta kimi uşaq liqaları təşkil olunmurdu. Çünki beynəlxalq futbol qurumlarının bununla bağlı lisenziya tələbi yox idi. Olsaydı, AFFA-da kimin idarəçi olmasından asılı olmayaraq, bu işlər qaydasına qoyulacaqdı. Həm də təməl daha sağlam olacaqdı. Məmmədovun təşkil etdiyi uşaq liqaları isə faydasız turnurdən, klublara əlavə yükdən başqa bir şey deyil.

…Qadın futboluyla bağlı baş katibin dedikləri də oxşar situasiyanın davamıdı. Klubları buna məcbur etmək,qondarma yarışlar təşkil etməklə qadın futbolunu inkişaf etdirmək olmur. Həqiqətən streotiplər dağıdılıbsa, niyə əsas milli komandamız yoxdu? Nəyə görə bütün milli komandalarımız milliləşdirilənlərlə doludur? Yoxsa Elxan bəy bu sahə üzrə kurator olduğundan qadın futbolunun olmayan inkişafı haqda cəh-cəh vurur? Qadınlar arasında 17 yaşlıların Dünya Kuboku da elə bu bağlılığın nəticəsi idi.

Baş katib ölkədəki stadionların durumundan da danışıb: “Artıq bütün klubların oynaya biləcəyi stadionlara sahibik. Onların sayı 9-dur. Ən böyük arena 58000-lik Olimpiya Stadionudur və Çempionlar Liqası ilə Avropa Liqasının final oyununa namizəddir. AVRO-2020-yə ev sahibliyi edəcək ölkələrdən biriyik. Bu, 10 milyon əhalisi olan kiçik bir ölkə üçün ən böyük futbol tədbiri olacaq”.

Məncə, bütün bunlar da cənab Məmmədovun xidməti deyil. Dövlətin dağıdılan milyonlarının qarşılığında ortaya çıxarılan 1-2 nailiyyəti öz adına çıxmaq qəbahətdi. Əksər arenalar dövlət proqramı çərçivəsində iş adamlarının və Dövlət Neft Şirkətinin sponsorluğu sayəsində ərsəyə gəldi. Olimpiya stadionu Elxan bəyin işgüzarlığına, işbilənliyinə görə yox, dövlət başçısının xidməti sayəsində tikildi. Həm də Avropa Oyunlarına görə…

Nədənsə baş katib dövlətin gördüyü işləri də təbliğat kampaniyasında detala çevirib. Halbuki milyonların fırlandığı Məmmədov erasından fərqli olaraq, Fuad Musayevin zamanında daha böyük işlər görülmüşdü.

Bu gün Elxan bəyin sayəsində AFFA-nın balansında olan 8 stadiona il ərzində 3.1 milyon manat xərclənir. Bu, yalnız həmin stadionların saxlanılması üçün sərf edilir. Halbuki Elxan bəy assosiasiyaya gələnəcən qurumun illik büdcəsi bunun yarısı, ümimi büdcənin 5 faizi qədər olmurdu və Musayev həmin pula milli komandaları saxlayır, 8 yox, 38, 28 klubun iştirak etdiyi çempionat təşkil edərək ölkə futbolunu idarə edir, üstəlik, qənaət edə-edə həmin pula “Şəfa” stadionunu da tikdirirdi. Həmin stadionu ki, baş katibin sayəsində 30-35 milyon manata girov qoyulub kredit götürülməsi mümkün olan qurğudu. Lakin Elxan bəy həmin arenanı cəmi 4 milyon manata satmağı lazım bildi. Görəsən, Elxan bəyin platformasında bu detal da varmı?

Kəsəsi, Elxan Məmmədovun bu açıqlamaları gözdən pərdə asmağa hesablanıb və real mənzərənin təhrifidi. UEFA-da gerçəkləri ya bilməyəcəklər, ya da biləndə artıq Elxan bəy seçilmiş üzv olacaq.

Fərid, Futbolinfo.az